Segunda Convocatoria do Programa Operativo de Cooperación Transfronteiriza España-Portugal 2007-2013 (POCTEP)
12/03/2010 | O pasado 1 de Marzo, o Programa Operativo de Cooperación Transfronteiriza España - Portugal 2007-2013 (POCTEP) anunciou a súa Segunda convocatoria de Proxectos. Esta convocatoria ten como obxectivo principal aumentar e ampliar o desenvolvemento das zonas de ambos os países con fronteiras comúns, atendendo ás prioridades definidas polo novo obxectivo de cooperación territorial europea.
A nova convocatoria visa mellorar a conectividade e as infraestruturas básicas das zonas fronteirizas, definir un novo enfoque para aumentar a competitividade, fomentar o emprego e reforzar a integración socioeconómica e institucional das rexións fronteirizas. Entre as súas prioridades atopamos a asistencia técnica ao proceso de cooperación transfronteiriza e a cooperación e xestión en diversas materias como, por exemplo, medio ambiente, ordenación territorial, integración económica e social, patrimonio, fomento da competitividade e promoción do emprego.
O apoio ás actividades empresariais, especialmente á expansión das PEMES; o desenvolvemento turístico, cultural e comercial; a protección ambiental; a redución do illamento e a cooperación transfronteiriza para o uso de infraestruturas e servizos comúns constitúen as directrices estratéxicas do proxecto.
Existen cinco áreas de cooperación de carácter territorial: Galicia/Norte de Portugal, Norte de Portugal/Castela e León, Castela e León/Centro de Portugal, Centro de Portugal/Estremadura/Alentexo, e Alentexo/Algarve/Andalucía. O proxecto debe contar con polo menos dous beneficiarios, un de cada Estado. O custo total mínimo dos proxectos será de 100.00 euros e o FEDER cofinanciará, como porcentaxe máxima, o 75% dos custos elixibles dos proxectos.
